СҚО жаналықтары
Солтүстік Қазақстан облысы аумағында «Заң мен тәртіп» қағидаттарын нығайту бағытындағы жұмыс нақты нәтижелермен көрініс табуда. Осы бағыттағы маңызды бастамалардың бірі — өңірдің барлық аудандары мен облыс орталығы Петропавл қаласын қамтыған «Нашақорлыққа жол жоқ!» атты ауқымды есірткіге қарсы акция, деп хабарлайды SKO24.kz.
.jpeg)
Іс-шара «Қауіпсіз қала» жобасы аясында жүзеге асырылып, прокуратура, полиция, жергілікті атқарушы органдар, коммуналдық қызметтер, жастар ұйымдары, волонтерлер мен студенттердің қатысуымен өтті. Бұл — қоғамдық қауіпсіздікті қамтамасыз етуде мемлекеттік құрылымдар мен азаматтық қоғамның бірлескен жұмысының айқын үлгісі.
Акцияның негізгі мақсаты — есірткі құқық бұзушылықтарының алдын алу, есірткі граффитилерінің таралуына тосқауыл қою және халықты есірткінің заңсыз айналымының құқықтық салдары туралы кеңінен ақпараттандыру.
Жүргізілген жұмыстар нақты көрсеткіштермен дәлелденеді. Соңғы екі жыл ішінде өңірде 2000-нан астам есірткі граффитиі анықталып, жойылды, 1500-ден астам интернет-ресурс бұғатталды. Сонымен қатар, прокуратураның үйлестіруімен 2000-нан астам банк шоты бұғатталып, осы шоттарда болған 60 миллион теңгеден астам қаражатқа тыйым салынды.
Ағымдағы жылдың басынан бастап 150 интернет-ресурс бұғатталып, 19 есірткі граффитиі жойылды, сондай-ақ халық арасында түсіндіру жұмыстарын күшейту мақсатында 2500-ден астам ақпараттық брошюра таратылды.
Бұдан бөлек, Қазақстан Республикасы Қылмыстық кодексінің 299-1-бабы бойынша есірткіні заңсыз жарнамалауға қатысты бірқатар қылмыстық істер сотқа жолданды.
Прокуратура қоғамда есірткіге деген мүлдем төзбеушілік қалыптастырудың маңыздылығын атап өтеді. Азаматтарды «жеңіл табыс» туралы күмәнді ұсыныстарға алданбауға және есірткі жарнамасының кез келген фактілері туралы, оның ішінде әлеуметтік желілерде де, құқық қорғау органдарына дереу хабарлауға шақырады.
Жалпы, қабылданып жатқан кешенді шаралар Солтүстік Қазақстан облысы өңірінде «Заң мен тәртіп» қағидаттарының нақты іске асырылып жатқанын көрсетеді. Қол жеткізілген нәтижелер бұл бағыттағы жұмыстың тиімді екенін дәлелдеп, алдағы уақытта да жүйелі түрде жалғасатынын айқындайды.
