СҚО жаналықтары
Солтүстік Қазақстан облысында энергетикалық инфрақұрылымды жаңғыртуға бағытталған ауқымды бағдарлама кезең-кезеңімен жүзеге асырылуда. Өңір дәстүрлі жылу энергетикасындағы әлеуетін нығайта отырып, жаңартылатын энергия көздерін жедел дамытуға басымдық беріп отыр, деп хабарлайды SKO24.kz.
Өңірдің энергетикалық жүйесіндегі негізгі нысан – «СЕВКАЗЭНЕРГО» АҚ құрамына кіретін Петропавл ЖЭО-2. Қазіргі уақытта станцияның қолданыстағы электр қуаты 541 МВт-ты құрайды. Есепті кезең қорытындысы бойынша электр энергиясын өндіру көлемі 2 510,6 млн кВт·сағатқа жетіп, өткен жылмен салыстырғанда 11,2 пайызға артты. Кәсіпорынның инвестициялық қоры 27,8 млрд теңге көлемінде қалыптастырылған.
Жаңғырту жұмыстары аясында №2 қазандық агрегаты мен №1 турбоагрегатты қайта жаңарту аяқталды. №1 жаңа түтін мұржасы пайдалануға берілді. Бұл шаралар жабдықтардың сенімділігін арттырып, станцияның экологиялық көрсеткіштерін жақсартуға мүмкіндік берді. Сонымен қатар электр желілері кешеніне де ерекше көңіл бөлінуде: 1 520 шақырым электр беру желісі, сондай-ақ 227 қосалқы станция мен тарату пункті жөнделді. Аталған жұмыстар апаттылық деңгейін төмендетуге және тұтынушыларды сапалы электр энергиясымен қамтамасыз етуге бағытталған.
Өңірде жаңартылатын энергия көздері саласы да қарқынды дамып келеді. Қазіргі уақытта жеті ЖЭК нысаны жұмыс істейді. Жел энергетикасы бағытында КТ «Зенченко и К» және «Иван Зенченко» ЖШС жүзеге асырған алты қондырғы бар. Олардың жиынтық қуаты 5,5 МВт-ты құрайды. Сонымен қатар қуаты 2,46 МВт болатын Сергеев су электр станциясы жұмыс істеп тұр.
Алдағы кезеңдегі ең ауқымды жоба – GREEN ERA COMPANY компаниясының жел электр станциясын салу бастамасы. Жоба аясында жалпы қуаты 200 МВт болатын 27 жел генераторын орнату жоспарланып отыр. Бұл бастама облыстың энергия теңгеріміндегі «жасыл» энергияның үлесін бірнеше есе арттыруға мүмкіндік береді.
Осылайша, Солтүстік Қазақстан облысы энергетиканы дамытудың теңгерімді моделін қалыптастырып отыр: қолданыстағы қуаттарды жаңғырту жаңартылатын энергия көздерінің ауқымды дамуына дайындықпен ұштасуда. Бұл өңірдің тұрақты экономикалық дамуына берік негіз қалайды.
