СҚО Жастар ресурстық орталығының басшысы Анастасия Волкова Құрылтай сайлауына жастардың қатысуының маңыздылығын атап өтті

Солтүстік Қазақстан облысының жастары 23 тамызда өтетін Құрылтай сайлауында өз азаматтық ұстанымдарын белсенді түрде білдіруге дайын. СҚО Жастар ресурстық орталығының басшысы Анастасия Волкованың айтуынша, бұл сайлау азаматтық қоғамды нығайту жолындағы маңызды қадамдардың бірі болмақ, деп хабарлайды SKO24.kz.

Анастасия Волкова азаматтардың белсенділігі артқан сайын қоғам мен мемлекет арасындағы сындарлы диалог орнатуға мүмкіндік көбейетінін атап өтті. Оның пікірінше, алдағы сайлауда әр адамның дауысы маңызды және азаматтардың жасы, мамандығы немесе әлеуметтік мәртебесі олардың қоғамдық өмірге қатысуына кедергі болмауы керек. Әсіресе жастардың азаматтық белсенділік танытуы маңызды, өйткені елдің болашақ дамуына үлес қосатын да — осы буын.

«Қоғамдық ұйымдар үшін бұл кезеңнің маңызы ерекше. Бұл — азаматтық белсенділіктің, құқықтық мәдениеттің және әр адамның ел өміріне қатысуының маңыздылығын тағы бір мәрте түсіндіруге мүмкіндік. Жастармен, оның ішінде NEET санатындағы азаматтармен жұмыс барысында білім беру, жұмыспен қамту, өңірлерді дамыту және жастар бастамаларын қолдау мәселелері көпшілікті алаңдататынын байқаймыз. Алайда олардың барлығы қоғамдық үдерістерге қалай ықпал ете алатынын түсіне бермейді. Сондықтан біздің міндетіміз — ашық диалог алаңдарын құру, ақпараттық-түсіндіру жұмыстарын жүргізу, жастардың құқықтық сауаттылығын арттыру және олардың қоғам өміріне белсендірек араласуына жағдай жасау», — деді Жастар ресурстық орталығының басшысы.

Анастасия Волкова Құрылтай құрамына бастамашыл, білікті және ел болашағына бейжай қарамайтын, сындарлы шешімдер ұсына алатын әрі қоғам мүддесін білдіретін азаматтар келеді деген сенім білдірді. Оның пікірінше, өңір тұрғындары кандидаттарды таңдауға жауапкершілікпен қарап, саналы таңдау жасауы маңызды.

«Алдағы сайлау азаматтық қоғамды нығайту жолындағы тағы бір қадам болады деп сенемін. Жастар үшін бұл — елдің болашағына өздерінің қатысы бар екенін сезіну, жеке жауапкершіліктің маңызын түсіну және Қазақстанның дамуы әрқайсымыздың қосқан үлесімізге байланысты екенін ұғыну мүмкіндігі. Сайлауға қатысу формальды міндет ретінде емес, әр азаматтың саналы шешімі ретінде қабылдануы маңызды», — деп қорытындылады солтүстікқазақстандық.