Петропавлда өткен ауқымды бос жұмыс орындары жәрмеңкесіне 50-ден астам жұмыс беруші қатысты

Петропавлдағы Оқушылар сарайында 50-ден астам жұмыс беруші қатысқан ауқымды бос орындар жәрмеңкесі өтті. Оған мыңға жуық адам – студенттер, оқу орындарының түлектері, жас мамандар, жұмыс іздеп жүрген азаматтар, соның ішінде NEET санатындағы жастар және барлық қызығушылық танытқан тұрғындар қатысты, деп хабарлайды SKO24.kz.

Оқушылар сарайының маңында кең ауқымды ақпараттық алаң ұйымдастырылып, онда облыстың түкпір-түкпірінен келген Жастар ресурстық орталықтарының басшылары студенттерге жан-жақты кеңес беріп, қолданыстағы мемлекеттік бағдарламалар мен қолдау шаралары туралы түсіндірді. Ашық диалог барысында мамандар қатысу шарттарын түсіндіріп, қадамдық нұсқаулықтары бар ақпараттық буклеттер таратты. Бұл жұмыс бүгінде ерекше өзекті, өйткені қалаға оқуға келген жастардың көпшілігі туған жеріне қайтуды жоспарламайды. Алайда қолдау шараларымен егжей-тегжейлі танысқан соң, олардың бірқатары өз аудандарына оралу туралы ойлана бастаған.

Ұсынылған мүмкіндіктерге қызығушылық танытқандардың бірі – 18 жастағы студент Артур Полуэктов.

«Мен Мағжан Жұмабаев атындағы Жоғары колледждің студентімін, бағдарламалық қамтамасыз ету әзірлеушісі мамандығында оқимын. Өзім Аққайың ауданынанмын. Болашақ қалай болатынын нақты білмеймін, бірақ қалада қалуым мүмкін. Мамандығым бойынша жұмыс істегім келеді. Ең бастысы – тұрақты әрі лайықты жалақысы бар тыныш жұмыс табу», – деді Артур Полуэктов.

Жәрмеңкеде негізгі мемлекеттік бастамаларды насихаттауға ерекше көңіл бөлінді. Атап айтқанда, «Жасыл ел» бағдарламасы таныстырылды. Бұл бағдарлама мектеп оқушыларына, студенттерге және жұмыссыз жастарға маусымдық жұмысқа орналасуға мүмкіндік береді. Сонымен қатар, 18 бен 35 жас аралығындағы жастарға арналған «Қызылжар жастары» ипотекалық бағдарламасы да үлкен қызығушылық тудырды.

Бұдан бөлек, жұмыс іздеушілерге еңбек жолын енді бастаған жастарға арналған «Бірінші жұмыс орны» жобасы таныстырылды. Сондай-ақ, «Ұрпақтар келісімшарты» бағдарламасының ерекшелігі атап өтілді. Бұл бағдарлама аясында зейнет жасына жақындаған қызметкерлердің тәжірибесін жас мамандарға беру үшін арнайы жұмыс орындары құрылады.

«Бұл жәрмеңкені облыстық және қалалық Жастар ресурстық орталықтары мен Карьера орталығы ұйымдастырды. Жастарды жұмыспен қамтуға жәрдемдесу – біздің қызметіміздің басты бағыттарының бірі. Қазіргі таңда медицина қызметкерлері, мұғалімдер, IT мамандары, мемлекеттік қызметшілер және жұмысшы мамандықтары сұранысқа ие. Статистикаға сүйенсек, бірінші тоқсан қорытындысы бойынша облыс бойынша Жастар ресурстық орталықтарына жұмысқа орналасу мәселесімен 193 адам жүгінді, оның 85-іне жұмыс табуға көмек көрсетілді. Жалпы, жыл басынан бері облыс бойынша осындай 25 жәрмеңке ұйымдастырылды», – деді Анастасия Волкова, СҚО ақпараттық-ресурстық орталығының жастар саясаты бөлімінің басшысы.

Іс-шара барысында қатысушылар бос жұмыс орындарымен танысып қана қоймай, жұмыс берушілерге тікелей сұрақ қойып, еңбек шарттары мен әлеуметтік кепілдіктерді талқылады. Әсіресе құқық қорғау органдары мен төтенше жағдайлар қызметіндегі бос орындарға қызығушылық жоғары болды. Бұл салалардағы талаптар мен жеңілдіктер туралы СҚО ТЖД аға инспекторы Акбата Шайкина кеңінен айтып берді.

«Қазіргі уақытта бізде 72 бос жұмыс орны бар. Біз өрт сөндіру автокөліктерінің жүргізушісі және өрт сөндіруші-құтқарушы қызметтерін ұсынамыз. Кандидаттарға қойылатын талаптар: білімі кемінде орта, жасы 35-ке дейін, бойы кемінде 165 см болуы тиіс. Әлеуметтік пакет қарастырылған: әр отбасы мүшесіне тұрғын үй төлемдері, еңбек өтілі мен атағына қарай өсетін тұрақты жалақы, мансаптық өсу мүмкіндігі. Сонымен қатар, ақылы еңбек демалысы және қызметкерлер мен олардың отбасы мүшелеріне тегін медициналық қызмет көрсетіледі», – деді ТЖД қызметкері.

Қатысушыларға бос орындар мен еңбек шарттары туралы толық мәлімет берілген ақпараттық буклеттер таратылды. Айта кету керек, жәрмеңкеге тек облыс орталығынан ғана емес, аудандардан да жұмыс берушілер келді. Мысалы, Ғабит Мүсірепов ауданында қызметкерлерге сұраныс жоғары. Аудан әкімінің аппарат басшысы Асхат Кенжебеков мемлекеттік қызметтегі бос орындарды толтыру мақсатында келді.

«Біздің ауданда 26 жергілікті атқарушы орган бар және 17 бос орын бар: оның 6-ы уақытша, 11-і тұрақты. Негізінен бас мамандар мен бухгалтерлер қажет. Жас мамандарды жұмысқа тартқымыз келеді. Мысалы, кадрларды басқару бөліміндегі бас маманның жалақысы еңбек өтіліне байланысты 263 мыңнан 302 мың теңгеге дейін», – деді Асхат Кенжебеков.

Жәрмеңкеге келген жастарға кәсіби бағдар беру жұмыстары да белсенді жүргізілді. Мамандар оларға түрлі ұсыныстар арасында дұрыс таңдау жасауға көмектесті. Петропавл қаласындағы жұмыссыздық деңгейі туралы Карьера орталығының директоры Даурен Зейнуллин мәлімет берді.

«Қазіргі таңда жұмыс берушілер мыңнан астам бос жұмыс орнын ұсынып отыр. Жыл басынан бері Карьера орталығының көмегімен 800-ден астам адам жұмысқа орналасты. 20 адам кәсіби оқуға жіберілді. Қазіргі уақытта техникалық мамандықтарға сұраныс жоғары. Бүгінде қала бойынша ресми түрде 1535 жұмыссыз тіркелген. Бұл жәрмеңкенің мақсаты – оларды барынша қамтып, мемлекеттік қолдау шаралары туралы ақпарат беру», – деді Даурен Зейнуллин.

Мамандардың айтуынша, мұндай бос орындар жәрмеңкелері халықты жұмыспен қамтуға ықпал ететін ең тиімді құралдардың бірі болып табылады.